ကိုယ့်နှလုံးခုန်သံ ကိုယ်ပြန်ကြားနေရတယ်။ ရင်ထဲမှာ တလှပ်လှပ်နဲ့ နေလို့မကောင်းဘူး။ နှလုံးခုန်နှုန်း (pulse rate) တိုင်းကြည့်တော့ ၁၀၀ကျော်နေတယ်။ နှလုံးရောဂါများ ဖြစ်နေမလားဟု တွေးမိဖူးပါသလား?
Tachycardia ခေါ် နှလုံးခုန်မြန်ခြင်း ဆိုတာဘာလဲ?
ပုံမှန် အရွယ်ရောက်ပြီးသူတစ်ယောက်ရဲ့ နှလုံးခုန်နှုန်းဟာ တစ်မိနစ်အတွင်း ၆၀-၁၀၀ ကြားဖြစ်ပါတယ်။
တစ်မိနစ်အတွင်း ၁၀၀ကျော်နေရင်တော့ ရင်တုန်တာ၊ အသက်ရှုမဝ ဖြစ်တာ၊ ခေါင်းမူးတာအစရှိတဲ့ နေလို့မကောင်းတဲ့ လက္ခဏာများ စတင်ခံစားလာရတတ်ပါတယ်။
ဘာတွေကနှလုံးခုန်မြန်ခြင်းကို ဖြစ်စေတတ်သလဲ?
- ဖျားနာခြင်း
- အရက် နှင့် ဆေးလိပ်သောက်သုံးခြင်း
- ကဖိန်းဓာတ် မြင့်တက်နေခြင်း
- အိပ်ရေးမဝခြင်း
- စိတ်လှုပ်ရှား၍ စိတ်ဖိစီးမှုများခြင်း တို့ဟာ နှလုံးခုန်မြန်ခြင်းကိုဖြစ်စေပါတယ်။ ဒီလို Tachycardia ဖြစ်စေသည့် အကြောင်းအရာတွေက အချိန်တိုအတွင်း ပြန်လည်ပျောက်ကင်းသက်သာသွားနိုင်ကြပါတယ်။
အချို့သော အရေးကြီးပြီး ကုသမှုခံယူသင့်တဲ့ အကြောင်းအရာများကတော့
- သွေးတွင်း electrolyte ခေါ် ဆားနှင့် အခြားပါဝင်ပစ္စည်းများ ဖြစ်ကြသည့် ပိုတက်စီယမ်၊ ကယ်လ်စီယမ်၊ မက်ဂနီစီယမ် ပမာဏမမျှတခြင်း
- သွေးပေါင်အရမ်းတက်ခြင်း
- သွေးအားနဲခြင်း
- Hyperthyroid ခေါ် သိုင်းရွိုက်ဟော်မုန်း မြင့်တက်ခြင်း
- သောက်ဆေးအချို့ကြောင့်ဖြစ်ခြင်း
- မူးယစ်ဆေးသုံးစွဲခြင်း နှင့်
- နှလုံးရောဂါရှိခြင်းများသည် ကျန်းမာရေးအတွက် အရေးကြီးလှပါတယ်။
နှလုံးခုန်နှုန်း မြန်နေခြင်းကို ဘယ်တော့ ကုသမှုခံယူသင့်သလဲ?
နှလုံးခုန်နှုန်း မြန်တာအပြင် အသက်ရှုမဝတာ၊ ရင်ဘတ်အောင့်တာ၊ မောနေတာ၊ အနေအထိုင်အစားအသောက်ဆင်ခြင်သော်လည်း မသက်သာတာ ၊ မူးမေ့လဲတာတို့ ဖြစ်နေပြီဆိုရင်တော့အမြန်ဆုံး ဆေးကုသမှုခံယူသင့်ပါတယ်။
